Plantun de Prouvènço

Pèr coumpara dos planto d'encò nostre

Juncus gerardi & Trisetum flavescens

Juncus gerardi

Juncaceae

Nom en français : Jonc de Gérard.

Descripcioun :
Aquéu jounc es uno planto renadivo emé de long rizoumo. Trachis dins li prado e pelouso umido, pulèu richo en sau e pas trop liuen de la mar. Fai uno pelouso gaire sarrado. Èi proche de Juncus compressus e coume éu si tepalo soun emé un bout redoun. Se destrìo pamens que si tepalo, longo de 3 à 3,5 mm, soun bruno e mai sourno sus li bord. Lou fru madur li despasso de mens de 1 mm e la brateolo èi peréu bruno. Coumpara emé lou joun-di-cambo-plato que ié sèmblo proun .

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Juncus
Famiho : Juncaceae

Ordre : Poales

Coulour de la flour : Brunello
Petalo : 6
Ø (o loungour) enflourejado : 3 à 10 cm
Flourido : Printèms - Estiéu

Sòu : Ca
Autour basso e auto : 0 à 900 m
Aparado : Noun
Mai à juin

Liò : Prado umido - Pelouso emé sau
Estànci : Termoumediterran à Mesoumediterran
Couroulougi : Bourealo
Ref. sc. : Juncus gerardi Loisel., 1809

Civadoun

Trisetum flavescens

Poaceae Graminaceae

Noms en français : Avoine dorée, Avoine jaunâtre.

Descripcioun :
Lou civadoun douno d'èr à uno pichouno civado emé si pichòtis espigueto (5 à 8 mm) coulour de fen seca que caupon dos à quatre flour. L'enflourejado èi di proun daurado e esbrihanto un cop maduro. Se recounèis peréu i glumo de dessouto que soun mai courteto e estrecho qu'aquéli de dessubre. Li lemma porton de lònguis arèsto estacado dessouto li tres pèr dos (fotò), e emé un couide.

Usanço :
Lou civadoun pòu douna encò li fedo, la "caucinoso pulmounàri enzououtico", valènt-à-dire la fourmacioun de teissu fibrous dins li poumoun. Pèr acò dèu pas èstre vist coume uno planto pasturiero.